Al didancuei ne ie i hotiei per families nia plu velch de nuef. Tl Sudtirol iel 23 albierghes, ulache l’ufierta y dut l cunzet ie nderzà a families cun mutons y mutans. Te n valguni de chisc hotiei, ne possen nianca apusté na majon sce n ne à degun pitli. Ora de chisc iel nce hotiei mé per granc, che ne azetea nia mutons y mutans. A chësta maniera uel l setor dl turism definì si "traget" for plu avisa, la hotelieres y i hotelieres à la puscibltà de urganisé y pité n’ufierta for plu spezialiseda, la turistes y i turisć sà cie che l ti aspieta y de cie che n possa se nuzé ntan la feries. I pères che ne à deguna fians o degun fions ne muessa ntan cëina per ejëmpl nia sté sentei dlongia mëndres y mëndri che fej matades y possa se goder la gheneda ntan che i paussa o sta a surëdl. I pères cun mutons y mutans nveze, possa se la ciaculé cun d’autri genitores y i pitli possa fé damat deberieda, nce ntan vel’prupostes d’assistënza. Chësta sort de vacanzes à suzes, ajache i turisć y la turistes ie for deplù ala crissa de n’ufierta che ie spezialiseda y ti va ancontra a si bujëns.
Nia mé per families y granc, ma nce per l’ëiles iel hotiei spezialisei. For deplù ëiles va de viac da sëules per viver na bela esperienza y per mparé a cunëscer de nueva persones y cultures. Ma l viagë da sëules possa nce vester na gran ndesfideda. Nrescides à mustrà su che l jì de viac de sëules vën cunscidrà, da belau la metà dl’ëiles, na cossa nia segura. Vel’hotiei uel ti jì ancontra a chësc cruze: “Female only". Perdrët ne ie chësc nia velch de nuef, davia che bele ti primes ani dl 1900 fovel tl America strutures mé per l’ëiles. Scumencià ova dut cun l fat che jëunes dla tlasses sozieles plu basses jiva a lauré tla gran ziteies. Iló stajoveles deberieda te cuatieres sota la verdia de na patrona de cësa. Bele plan ova for deplù ëiles scumencià a se n jì da cësa, nce per jì n feries, y de cunseguënza fova aumentà l numer de hotiei che ti dajova d’albierch mé a d’ëiles. Chisc hotiei fova posć segures che judova nce a normalisé l fat che l’ëiles se spustova y jiva de viac da sëules. Ala fin di ani 70 ne fovel pona nia plu n grum de tei hotiei, davia che l'ëiles ne n ova nia plu de bujën de se despartì.
Ultimamënter iel inò plu y plu hotiei che ti dà mé d’albierch al’ëiles. Tl Suditrol ne n iel mo degun, ma dla Spania per ejëmpl a giaurì un tl ann 2019 . Uel pa chësc dì che al didancuei se sënt l’ ëiles al segur mé sce les ie danter ëiles o cumparësc pa inò na vedla spezialisazion di hotiei che vën nterpreteda da nuef? L cunsëi per la valivanza di dërc dl Denemarch ie dla minonga che chësta sort de hotiei porta a na descriminazion dl auter ses. La cossa ne ie mo nia stata ejamineda assé per pudëi dì sce la nes porta n var inant o doi de reviers.